Текст песни Ордо Сахна - Бекбекей

Ийнемдин учун майтардым,
Бүгүн бир короо кайтардым.
Ийнемдин учун түзөттүм
Ишенбей короо күзөттүм.
Уугумдун учу долоно,
Ууру да, бөрү жолобо.
Ууру бир келсе уштайбыз,
Башын бир айра муштайбыз.

Короомдун чети таман жол,
Кайтарган короом аман бол.
Кыз-келин короо кайтарган,
Илгертен калган салт ошол.
Ууру бир келсе уштайбыз,
Бетин бир айра муштайбыз,
Төөгө чиркеп байлайбыз,
Төбөгө чаап айдайбыз.

Ак сай менен көк сайдай,
Таш алышкан Бекбекей.
Арпа менен буудайдай,
Баш алышкан Бекбекей.
Күңгөй менен Тескейдей,
Бет алышкан Бекбекей.
Кайтарган короом алты жүз,
Алты айланып келгенче
Алты аркар жылдыз батпайбы
Таң сөгүлүп атпайбы
Кайтарган коюм жети жүз.
Жети айланып келгенче,
Жети аркар жылдыз батпайбы
Таң кашкайып атпайбы
Кара бир тоону этектеп,
Мен коноюн Бекбекей.
Кара бир макмал тонуңа
Жеңиң болоюн, Бекбекей.
Кызыл тоону этектеп.
Мен коноюн, Бекбекей.
Кызыл бир жака тонуңа,
Жеңиң болоюн, Бекбекей.
Ичерип турган кашыңа
Кабыл болоюн, Бекбекей

Бекбекей айтып кыз-келин
Ай жарыгы түндө ойнойт
Адырда жылкы кайтарган
Жылкычы жигит кимди ойлойт