Lyrics Альберт Узденов - Къара суучукъ

музыка Альберта Узденова
стихи Дахира Кубанова, Альберта Узденова

Суу алыб келе къара суучукъдан,
Бир къонакъ джашха тюбедим.
"Къызчыкъ, суусабма", - деб айтханында,
Мен да анга, сюйюб, суу бердим.

"Къайда кёргенме, къайдан таныйма?" -
Деб келди мени кёлюме.
Ол да, менича, бек сейирсиниб,
Джити къарады кёзюме.

Джаш суудан ичиб, кёб алгъыш этиб,
Ауушла таба атланды.
Къууанчым кетиб, джюрегим тебиб,
Мен аны ызындан таралдым.

Къайсы ауушда бара болурса,
Джанымдан эсе сюйгеним?
Шагъырей джолчукъ бла энтда келирсе, -
Деб ышанады джюрегим.

Орайда-ра-ра, ойда-орайда,
Орайда-ра-ра, орайда.
Шагъырей джолчукъ бла энтда келирсе, -
Деб ышанады джюрегим.

(Дахир Кубанов)

***

Джазыуда болсала, адамла тюбейле.
Джюрекден джюрекге джол барды дейдиле.
Билмесем да, къызчыкъ, сени атынгы,
Кетиб бара, эштиб джюрек ауазынгы,
Джууаб береме, бир эшт сен да мени джюрек аууазымы.

Уялтама деб, тау намыс этиб,
Сормай атын да терк кетдим.
Ичген сууум бла сюймеклик сингиб,
Таулагъа къараб ант этдим:

Къайда болсам да, сени табарма,
Къаршчы чыкъса да джазыуум!
Шагъырей джолчукъ бла энтда барырма…
Сакъла сен мени, ариуум.

Орайда-ра-ра, ойда-орайда,
Орайда-ра-ра, орайда.
Шагъырей джолчукъ бла энтда барырма…
Сакъла сен мени, ариуум.

(Альберт Узденов)